ਗ਼ਜ਼ਲ
(ਡਾਕਟਰ ਸਾਥੀ ਲੁਧਿਆਣਵੀ)
ਅੱਖਾਂ ਝੀਲ ਚਿਹਰਾ ਗ਼ੁਲਾਬ ਵਰਗ਼ਾ ਹੈ ।
ਤੇਰਾ ਸ਼ਬਾਬ ਸ਼ਰਾਬ ਵਰਗ਼ਾ ਹੈ ।
=ਪਹਿਲੀ ਛੁਹ,ਪਹਿਲੀ ਮੁਸਕਾਨ ਤੇ ਸੰਗ,
ਤੇਰਾ ਹੁਸਨ ਪਹਿਲੇ ਆਦਾਬ ਵਰਗਾ ਹੈ।
=ਚਾਲ ਮਸਤ ਹੈ ਦਰਿਆ ਵਰਗੀ,
ਲਿਬਾਸ ਸੁੰਦਰ ਕਿਤਾਬ ਵਰਗ਼ਾ ਹੈ ।
=ਪੱਤੀ ਪੱਤੀ 'ਚ ਹੀ ਮਹਿਕ ਹੈ,
ਤੇਰਾ ਬਦਨ ਗ਼ੁਲਾਬ ਵਰਗ਼ਾ ਹੈ ।
=ਤੇਰੀ ਹਿੱਕ ਦਾ ਉਭਰਨਾ ਉਤਰਨਾ,
ਚੜ੍ਹਦੇ ਲਹਿੰਦੇ ਝਨਾਬ ਵਰਗ਼ਾ ਹੈ ।
=ਗੱਲਾਂ ਅਜ਼ਾਦ ਨਜ਼ਮਾਂ ਵਰਗੀਆਂ ਹਨ,
ਮਨ ਅਨਪੜ੍ਹੀ ਕਿਤਾਬ ਵਰਗ਼ਾ ਹੈ ।
=ਤੇਰਾ ਮਨ ਨਿਰਮਲ ਹੈ ਬਹੁਤ,
ਤੇਰਾ ਮਨ ਡੂੰਘੇ ਤਲਾਬ ਵਰਗਾ ਹੈ,
=ਤੇਰਾ ਸਾਥ ਹੈ, ਮਹਿਕੀ ਹਵਾ ਹੈ,
ਅੱਜ ਮੌਸਮ ਸ਼ਰਾਬ ਵਰਗ਼ਾ ਹੈ ।
=ਤੇਰੇ ਬਿਨ ਰੋਸ਼ਨੀ ਨਹੀਂ ਹੈ,
ਤੇਰੇ ਬਿਨ ਸੱਭ ਹਜਾਬ ਵਰਗਾ ਹੈ ।
=ਜ਼ਮਾਨੇ ਤੋਂ ਸੰਭਲ਼ ਕੇ ਰਹੀਂ,
ਇਹਦਾ ਸੁਭਾਅ ਉਕਾਬ ਵਰਗ਼ਾ ਹੈ ।
=ਮੁਹੱਬਤ ਦੀ ਦੌਲਤ ਹੈ ਸਾਡੇ ਕੋਲ਼,
ਸਾਡਾ ਜੀਵਨ ਨਵਾਬ ਵਰਗ਼ਾ ਹੈ ।
=ਇਸੇ ਲਈ ਸਵਾਲ ਨਹੀਂ ਪੁੱਛਿਆ,
ਇਹ ਸਵਾਲ ਤੇਰੇ ਜਵਾਬ ਵਰਗਾ ਹੈ ।
=ਇਹ ਨਾਮ ''ਸਾਥੀ ਲੁਧਿਆਣਵੀ'',
ਤੇਰੇ ਦਿਤੇ ਖ਼ਿਤਾਬ ਵਰਗ਼ਾ ਹੈ ।
