ਕੁੜੀ ਮਲਾਲਾ

 

(ਡਾ. ਸਾਥੀ ਲੁਧਿਅਣਵੀ-ਲੰਡਨ)

( ਪੰਦਰਾਂ ਵਰ੍ਹਿਆਂ ਦੀ ਮਲਾਲਾ ਯੁਸਫ਼ਜ਼ਈ ਨੂੰ ਸਕੂਲ ਜਾਂਦਿਆਂ ਹੋਇਆਂ ਪਾਕਿਸਤਾਨ ਵਿਚ ਇਕ ਤਾਲਿਬਾਨ ਨੇ ਗੋਲ਼ੀ ਮਾਰ ਦਿੱਤੀ ਸੀ । ਤਾਲਿਬਾਨਾਂ ਨੂੰ ਮਲਾਲਾ ਦੀ ਇਹ ਗੱਲ ਉੱਕਾ ਮਨਜ਼ੂਰ ਨਹੀਂ ਸੀ ਕਿ ਉਹ ਪਾਕਿਸਤਾਨੀ ਕੁੜੀਆਂ ਦੇ ਮਨੁੱਖੀ ਅਧਿਕਾਰਾਂ ਦੇ ਹੱਕ ਵਿਚ ਬੋਲਦੀ ਸੀ।ਮਲਾਲਾ ਨਾ ਸਿਰਫ਼ ਪਾਕਿਸਤਾਨੀ ਕੁੜੀਆਂ ਨੂੰ ਤਾਲੀਮ ਦੇਣ ਦੇ ਹੱਕ ਵਿਚ ਹੀ ਸੀ ਸਗੋਂ ਉਹ ਸੈਕੂਲਰ ਸੋਚ ਦੀ ਵੀ ਪ੍ਰੋੜ੍ਹਤਾ ਕਰਦੀ ਸੀ। ਉਹ ਕਹਿੰਦੀ ਸੀ ਕਿ ਇਹ ਅੱਤਵਾਦੀ ਪਾਕਿਸਤਾਨ ਨੂੰ ਕਈ ਸਦੀਆਂ ਪਿਛਾਂਹ ਵੱਲ ਧੱਕਣ ਦੀ ਕੋਸ਼ਸ਼ ਕਰ ਰਹੇ ਸਨ।ਤਲਿਬਾਨਾਂ ਵਲ੍ਹੋਂ ਪੈਦਾ ਕੀਤੇ ਗਏ ਡਰ ਵਾਲ਼ੇ ਮਹੌਲ ਸੰਬੰਧੀ ਉਹ 2007 ਤੋਂ ਇਕ ਡਾਇਰੀ ਵੀ ਲਿਖ਼ ਰਹੀ ਸੀ।ਇਹ ਕਵਿਤਾ ਮੈਂ ਉਸੇ ਦਿਨ ਲਿਖ਼ੀ ਸੀ ਜਿਸ ਦਿਨ ਮਲਾਲਾ ਨੂੰ ਸ਼ੂਟ ਕੀਤਾ ਗਿਆ ਸੀ। ਯੂ ਐਨ ਓ ਵਾਲ਼ਾ ਸ਼ੇਅਰ ਨਵਾਂ ਹੈ।ਉਸ ਨੇ ਯੂ ਐਨ ਓ ਵਿਚ ਆਪਣੇ ਸੋਲ੍ਹਵੇਂ ਜਨਮ ਦਿਨ ਉੱਤੇ ਪਾਵਰਫ਼ੁੱਲ ਤਕਰੀਰ ਕੀਤੀ ਸੀ।ਮਲਾਲਾ ਦਾ ਨਾਮ ਨੋਬਲ ਪੀਸ ਪ੍ਰਾਈਜ਼ ਲਈ ਵੀ ਰੀਕੁਮੈਂਡ ਹੋ ਚੁੱਕਿਆ ਹੈ।-ਸਾਥੀ)

 

ਕੁੜੀਆਂ ਵਿਚੋਂ ਕੁੜੀ ਮਲਾਲਾ।

ਖੰਡ ਮਿਸ਼ਰੀ ਦੀ ਪੁੜੀ ਮਲਾਲਾ।

=ਉਨ੍ਹਾਂ ਨੇ ਚਾਹਿਆ ਪੜ੍ਹਨੋਂ ਲਿਖ਼ਣੋਂ,

ਰਹੇਗੀ ਹਰਦਮ ਥੁੜੀ ਮਲਾਲਾ।

=ਬਦਅਮਨੀਂ ਦੇ ਵਹਿੰਦੇ ਹੜ੍ਹ ਵਿਚ,

ਰੁੜ੍ਹੀ ਕਿ ਇਕ ਦਿਨ ਰੁੜ੍ਹ੍ਹੀ ਮਲਾਲਾ।

=ਉਨ੍ਹਾਂ ਸੋਚਿਆ ਮਰ ਜਾਵੇਗੀ,

ਹੁਣ ਨਾ ਮੌਤੋਂ ਮੁੜੀ ਮਲਾਲਾ।

=ਪਾਕਿਸਤਾਨ ਦੀ ਐਨ ਫ਼ਰੈਂਕ ਹੈ,

ਡਾਇਰੀ ਲਿਖ਼ਦੀ ਕੁੜੀ ਮਲਾਲਾ।

=ਆਦਮ ਅਤੇ ਹਵਵਾ ਦੀ ਬੇਟੀ,

ਲਾਡਾਂ ਤੋਂ ਨਾ ਥੁੜੀ ਮਲਾਲਾ।

=ਚਿੜੀ ਹੈ ਬਾਬਲ ਦੇ ਵਿਹੜੇ ਦੀ,

ਅੰਬਰ ਵੱਲ ਨੂੰ ਉੜੀ ਮਲਾਲਾ।

=ਜੋ ਮਰਦਾਂ ਤੋਂ ਕਰ ਨਾ ਹੋਈ,

ਉਹ ਗੱਲ ਕਰ ਗਈ ਕੁੜੀ ਮਲਾਲਾ।

=ਹੱਕ ਸੱਚ ਦੀ ਫ਼ਤਿਹ ਹੈ ਹੁੰਦੀ,

ਮੁੜੀ ਵਤਨ ਨੂੰ ਮੁੜੀ ਮਲਾਲਾ।

=ਪਾਕਿਸਤਾਨ ਨੇ ਧੀਆਂ ਜੰਮੀਆਂ,

ਬੇਨਜ਼ੀਰ ਤੇ ਕੁੜੀ ਮਲਾਲਾ।

=ਯੂ ਐਨ ਓ ਵਿਚ ਬੋਲੀ ਜਦ ਉਹ,

ਹਰ ਥਾਂ ਛਾ ਗਈ ਕੁੜੀ ਮਲਾਲਾ।

=ਤੂੰ ਕੱਲੀ ਨਹੀਂ ਤੇਰੇ ਸੰਗ ਹੈ,

"ਸਾਥੀ" ਦੁਨੀਆਂ ਜੁੜੀ ਮਲਾਲਾ।